Manchester United er saman við West Ham og Southampton víðari til fjórðingsfinalurnar í Liga Cup kappingini í Onglandi í kvøld. José Mourinho og hansara menn vunnu 1-0 á Old Trafford á grannunum úr Manchester City.
Juan Mata skoraði einsamalla málið í dystinum í seinna hálvleiki, eftir gott uppspæl frá Zlatan Ibrahimovic. Manchester United hevði munin leikliga á degnum, men hevði helst sterkari lið í mun til Manchester City. Bæði høvdu eykaspælarar inni.
West Ham vann 2-0 á grannunum úr Chelsea, meðan Southampton vann 1-0 á botnproppinum í Premier League, Sunderland. Venjarin há teimum, David Moyes, rundaði kvøldið av við at blíva útvístur.
Lutakast til fjórðingsfinalurnar hevur verið. Liverpool, Manchester United og Arsenal fingu heimavøll og eru favorittar at koma víðari.
Fjórðingsfinalur:
Liverpool – Leeds
Manchester United – West Ham
Hull – Newcastle
Arsenal - Southampton
