Pól Thorsteinsson hevur síðani sítt gjøgnumbrot á landsliðnum á Malta á sinni verið roknaður millum bestu verjuleikarar í landinum. Tískil verður hann ein av lyklaleikarunum í finaluni, um hann verður førur fyri at spæla.
-Í løtuni eri eg ivasamur, men eg rokni við og vóni sjálvsagt, at eg verði førur fyri at spæla, sigur Pól Thorsteinsson.
HB hevur í ár havt uttan iva besta álopið í landinum, har Andrew av Fløtum og Jón Rói Jacobsen tilsamans hava skotið 19 mál í landskappingini, og tískil fær NSÍ harðliga brúk fyri landsliðsleikaranum í verjuni, tá liðini bæði bresta saman ólavsøkudag.
Góður íslandstúrur
NSÍ hevur undan steypafinaluni verið á venjingarlegu í Íslandi, og Pól Thorsteinsson sigur, at hetta avgjørt hevur verið ein góður túrur fyri hópin, og at liðið nú er væl fyri, hóast NSÍ hevur bæði leikbann og skaðar í hópinum. Sambært Pól hava teir vant nógv og spælt tveir venjingardystir, og tí hava fyrireikingarnar verið góðar,
- Tískil haldi eg, at vit vinna dystin móti HB á ólavsøku, og tað hava vit alla orsøk til at trúgva uppá, endar ein avgjørdur vágbingur í útlegd í Runavík, sum sjálvur er ivasamur undan steypafinaluni móti HB vegna skaða.
Myndatekstur: Pól Thorsteinsson er ivasamur til steypafinaluna á ólavsøku, men hann væntar at kunna spæla. ? Vit vinna dystin, sigur landsliðsleikarin avgjørdur
