Svøríki hevur í dag vunnið 1-0 á Suðurkorea í bólki F. Avgerandi málið kom miðskeiðis í seinna hálvleiki, tá liðskiparin í miðverjuni hjá Svøríki, Andreas Granqvist, umsetti brotsspark til mál.
Brotssparkið bleiv givið við hjálp av VAR, sum er dómarahálp við video. Ein svenskari fór umkoll í brotsteiginum, men dómarin bríkslaði í fyrstu atløgu ikki fyri brotssparki. Men nøkur sekund seinni steðgaði hann á og gav tekin um brúka av VAR. Har sæst, at svenski spælarin verður feldur.
Andreas Granqvist var púra róligur úr ellivu metrum og skoraði til 1-0. Í fyrra hálvleiki var tað annars Suðurkorea, sum tóktist hava munin í spælinum, meðan svenski Marcus Berg var nærmastur við at skora.
Í seinna hálvleiki hevði Svøríki spælið í fyrra partin av hálvleikinum, men Suðurkorea hevði møguleikar at javna, men raktu millum annað ikki málið, tá teir stútaðu úr stuttari fjarðstøðu.
Bólkur F:
Svøríki – Suðurkorea 1-0 (0-0)
1-0 Andreas Granqvist, 65 br
Í gjár:
Týskland – Meksiko 0-1 (0-1)
0-1 Hirving Lozano, 35
Støðan:
1. Meksiko 3 (stig)
2. Svøríki 3
3. Týskland 0
4. Suðurkorea 0
