Tað vísir nýggj veljarakanning, sum spyr.fo hevur gjørt fyri Sosialin.
Kanningin ger Fólkaflokkin til størsta flokk í Føroyum. Hann fær 25,6 prosent av atkvøðunum, ein framgongd upp á 6,6 prosentstig, sum gevur flokkinum 9 tingsessir.
Harvið vinnur Fólkaflokkurin alt tað, sum hann misti á seinasta løgtingsvali, tá afturgongdin hjá flokkinum var 6,0 prosentstig.
Næststørstur verður Sambandsflokkurin, sum fær 23,3 prosent av atkvøðunum, 3,3 prosentstig meira enn á valinum 8. november í 2022. Tað hevði verið besta valúrslitið hjá Sambandsflokkinum í 12 ár, síðani 2011, tá flokkurin hevði 24,7 av atkvøðunum við Kaj Leo Holm Johannesen sum formanni og løgmanni.
Sambandsflokkurin hevði eina lítla afturgongd á seinasta løgtingsvali, upp á 0,7 prosentstig, men tað hevur hann vunnið væl og virðiliga innaftur við hesi kanningini, sum gevur houm 3,3 prosent í framgongd.
Javnaðarflokkurin fær størsta slagið. Flokkurin gongur 4,8 prosentstig aftur og fær bara 21,8 prosentstig ímóti 26,6 á seinasta løgtingsvali. Tað gevur flokkinum sjey tingsessir, tveir færri enn á seinasta løgtingsvalið. Aksel V. Johannesen, formaður floksins og løgmaður, kann tó ugga seg við, at hendan kanningin er heldur frægari enn tann, sum spyr.fo gjørdi fyri Kringvarpið 5. desember í fjør, tá Javnaðarflokkurin fekk 18,7 prosentstig og 6 tingsessir. Í mun til ta kanningina vinnur hann 3,1 prosentstig innaftur.
Men tað er ikki nóg mikið, tá Tjóðveldi eisini gongur aftur. Tjóðveldi fær í kanningini 15,8 prosent, sum er ein afturgongd upp á 1,9 prosentstig, sum gevur flokkinum 5 tingsessir í mun til 6 á valinum. Tjóðveldi gekk eins og Sambandsflokkurin 0,7 prosentstig aftur á valinum, so tað ger bara støðuna enn verri.
Framsókn gongur eisini aftur. Flokkurin fær í kanningini 5,7 prosentstig í mun til 7,5 á valinum, ein afturgongd upp á 1,8 prosentstig, og tað kostar flokkinum ein tingsess, so hann fær tveir.
Miðflokkurin gongur eisini aftur. Hann fær 5,8 prosent í mun til 6,6 valinum, men hann varðveitir báðar tingsessirnar. Miðflokkurin er einasti flokkur, sum varðveitir tingfólkatalið.
Sjálvstýri vinnur heldur ikki upp um tinggáttina í hesi kanningini.
Lesið meira um kanningina í Sosialinum, sum fæst í leysasølu kring landið. Haldarar kunnu eisini lesa blaðið á sos.fo
Í blaðnum er eisini stór kanning um, hvat føroyingar halda um kongshúsið og um nýggja kong okkara Fríðrik X.
