Jana Mittún og liðfelagarnir í Viborg spældu í dag dyst í bestu donsku hondbóltsdeildini á útivølli móti Aarhus.
Aarhus vann dystin 26-23. Heimaliðið var frammanfyri 14-13 í steðginum.
Tað gekk ikki so væl við málskjótingini hjá Janu í dag. Jana skoraði tvey mál upp á 10 málroyndir. Hinvegin legði Jana upp til seks mál (assist), og hon hevur higartil í kappingini heili 80 assist, ið er tað triðmesta í bestu donsku deildini.
Viborg er nummar fimm í deildini við 24 stigum fyri 19 dystir.
Týskvøldið klokkan 19 taka Jana og liðfelagarnir á heimavølli móti Pernille Brandenborg og liðfeløgunum í Keypmannahavn. Keypmannahavn er tvey stig aftanfyri Viborg, og er nummar seks í deildini við 22 stigum.
