Eitt bandakríggja hevur seinastu vikurnar herjað danska høvuðsstaðin, ið millum annað hevur ført við sær, at Frank Jensen, yvirborgarstjóri í Keypammahavn, hevur boðað frá, at tað eru summi økir í býnum har borgarar ikki kunna kenna seg trygg.
Løgreglan tykist at hava trupult við at basa harðskapinum, og eftir tríggjar skottilburðir seinastu tveir dagarnar hava fleiri politikarar blanda seg í málið. Seinastur í røðini er Naser Khader, tinglimur fyri Konservativa flokkin, ið heitir á løgregluna at gera meira fyri at steðga stríðnum.
- Løgreglan má inn og gerast sjónlig. Og um løgreglan ikki hevur nokk av orku, so mugu teir biða um styrki frá øðrum økjum í landinum. Tað varð gjørt í Aarhus Vest nýliga, og tað eydnaðist at fáa tamarhald á bandunum har – tað sama má gerast í Keypmannahavn, sigur Naser Khader við DR.
Um tað ikki er nokk at enda stríðið, so ynskir fólkatingslimurin, at danski herurin kemur upp í leikin.
- So ber til at spyrja herin um at hjálpa við nøkrum av uppgávunum, sum løgreglan hevur í løtuni – til dømis uppgávur í samband við varðhald – so løgreglan kann brúka teirra orku at fara eftir bandalimunum, sigur Naster Khader.
Løgreglan metir, at bandakríggið er millum motorsúkklubandan Loyal to Familia og ein bólk, ið heldur til í býarpartunum Mjølnerparken og Nordvest.
