Nógv bendir á, at Gunnar Vatnhamar verður seldur til íslendska Víkingur Reykjavík í vikuni. 28 ára gamli landsliðsmiðverjin hevur verið eitt álit í verjuni hjá Víkingi í Gøtu og Leirvík, men nú ljóðar at hann verður seldur til navnafelagið í Íslandi.
Sum skilst hevur ein ávísur áhugi verið fyri landsliðsspælaranum, nú flytingarvindeygað í Íslandi letur aftur leygardagin. Tað eru væl fleiri pengar í íslandskum fótbólti í løtuni enn tað er í Føroyum. Breiðablik hevði heldur ikki trupulleikar at ognar sær Klæmint A. Olsen í eitt ár, meðan Patrik Johannesen bleiv keyptur leysur úr Keflavík.
Gunnar Vatnhamar hevur verið fastur fúsi á landsliðum og við tí fylgja landsliðspengar. Tað er ikki ringt at rokna út, at Víkingur illa vil sleppa leirvíkinginum í miðverjuni, men at íslendska Víkingur Reykjavík her er komið við einum góðum boði.
Hetta er enn ein meinbogi fyri Víking, sum undan kappingarbyrjan seldi Noah Hans Mneney til norska Bryne FK. Tað vitnar um gott arbeiði í felagnum, men samstundis fánar vónin um eitt meistarastríð, um Gunnar Vatnhamar áðrenn leygardagin verður seldur til Víking Reykjavík, tí føroyska felagið fær ikki keypt sær styrk inn, tí flytingarvindeygað í Føroyum er latið aftur.
Tíðindini eru ikki váttaði, men sum skilst verður nú arbeitt útfrá, at Gunnar Vatnhamar skiftir til íslendskan fótbólt.
