Sámal Joensen, 144 (32) mál
Stóri bakkurin stríddist eitt skifti við ein ryggskaða, men spæliklárur er hann altíð ein av týdningarmestu leikarunum á liðnum. Skothóttanin er øgilig, og í verjupartinum liggur hansara partur sjáldan eftir. Er eisini tvey ár á rað kosin ársins verjuleikari
Ragnar Zachariasen, 34 mál
Eftir eitt ár í útlegd var Ragnar aftur í Vestmanna í ár. Vápn hansara eru fyrst og fremst skjótleiki og skotstyrki, og harafturat er hann altíð ein av teimum, sum stríðist fyri sakini. Stríðsviljin gerst tó onkuntíð til ovurhugi, men hetta er nakað, sum kann betrast.
Agnar Joensen, 60 (1) mál
Er helst ein av fjølbroyttastu leikarunum hjá meistarunum. Kann nýtast alla staðni á vøllinum, tó at tað aloftast er á veinginum, at hann ger um seg. Ger sjáldan nakran háva burtur úr sær sjálvum, men spælir sítt spæl við umhugsni, og er tí ein sera týdningarmikil liðspælari.
Ingi Olsen, 126 (13) mál
Kanska besti føroyski hondbóltsleikarin eigur aftur í ár sín stóra lut í gullinum hjá VÍF. Bæði sum spælskipari og skothóttan er týdningur hansara ovurstórur fyri liðið. Hevur harumframt eginleikan at seta ferð á, tá nógv stendur á, og í so máta kann liðið neyvan vera hann fyri uttan í týdningarmiklum dystum.
Harald Bjørgvin, 36 mál
Fimi vongurin hevur kanska ikki verið eins sjónskur í ár, sum hann vanliga er, men spælistílurin er framvegis hin sami. Altíð við í skjótálopum, og í gjøgnumbrotum av veinginum gera lága tyngdarpunkti og liðiliga likamið, at hann altíð er ein hóttan.
Petur Frank Joensen, 18 mál
Hóast hann ikki skjýtur nógv mál, so er Agnar ein av týdningarmestu liðunum í álopsspælinum hjá VÍF. Við screeningum sínum er tað aloftast hann, sum skapar rúm fyri bakspælarunum, og í verjupartinum er tað ongan tíð ein løtt uppgáva at sleppa framvið honum.
Áki Olsen, 117 (13) mál
Aftur í ár hevur stórskjúttin á liðnum verið darvaður av skaðum, men tó at hann ikki hevur verið í hægsta geari, so er skotstyrkin framvegis ræðandi. Dregur og bíðar aloftast somikið leingi, at verjugarðurin aloftast er komin niður, áðrenn skotið verður latið, og so eru flestu málverjar í landinum seldir.
Rógvi Nielsen, 40 mál
Í mun til liðfelagan á strikuni, Agnar, verður Rógvi nýttur meira sum ein hóttan móti mótstøðumálinum. Tætti bulurin ger, at hann er sera ringur at halda, og royndirnar gera, at hann aloftast lesur málverjan av, áðrenn bólturin verður sleptur. Er hartil ein tryggur skansi í verjuni.
Daniel Rápa, 36 mál
Uttan iva ein av bestu leikarunum í landinum.Innspælingar hansara til viðspælarar eru í serflokki, meðan skotstyrkin tíverri ikki fylgir sama mátistokki. Er eisini ein av stýrandi kreftunum í verjupartinum, har hann alla tíðina stuðlar uppundir viðleikararnar.
Bárður Nielsen, 1 mál
Ein av landsins bestu málverjum, sum serstakliga er fimur inni í linjuni. Hevur ein vilja og eina útstráling, sum alla tíðina sýna sjálvsálit og stríðsanda, og setir tí altíð fer á viðleikarar. Er tó kanska eitt sindur óstøðugur í avrikunum, men skyldast hetta eisini skiftandi verjuspælinum hjá liðnum.
Jón Nielsen
Tað var ikki fyrr enn at Eli Müller varð lagdur undir skurð, at Jón kom inn í besta hópin hjá VÍF. Prógvaði tó alt fyri eitt, at hóast hann í nøkur ár hevur hugnað sær millum teir næstbestu, so eru evnini framvegis intakt. Var í fleiri dystum munurin á vágskálini, sum í flestum førum koppaði til VÍF.
John Zachariasen, 1 mál
Seiansti dystuirin gjørdist eisini hin einasti hjá John. Hendan veturin hevur hann fyri tað mesta nýtt á sjónum, og tí er lítið og einki gjørt við hondbóltin. Sýndi tó, nú hann fekk møguleikan, at hondbóltsevnini framhaldandi eru til staðar.
