Tað staðfestir Annika Olsen, landsstýriskvinna í almannamálum.
Seinastu tíðina hevur kikarin rættiliga verið settur á eldrarøktina og í hesum sambandi hevur ein stórur spurningur verið, hvussu umfatandi hetta málsøkið í grundini er.
Tá ið Kristianna Winther Poulsen, nýliga hevði sætið á tingið eitt stutt skifti sum varalimur, brúkti hon høvið til at spyrja landsstýriskvinnuna um hesi viðurskifti.
Landsstýriskvinnan sigur, at í dag hava 1.094 fólk tørv á sjúkrarøkt og 474 fólk hava tørv á heimahjálp.
Her kann leggast afturat, at tilsamans eru eini 6.500 fólk í Føroyum, sum eru eldri enn 67 ár og sostatt er veruleikin, at nógv tey flestu hava góða heilsu og klára seg sjálvi.
– Ongin bíðilisti er til heimatænastu og sostatt er talið á teimum, sum fáa tænastu frá Heimatænastuni, og teimum, sum hava tørv á hjálp, tað sama, sigur Annika Olsen.
Hon leggur tó afturat, at tey flestu av teimum 1.094 borgarunum, sum fáa sjúkrarøkt frá heimasjúkrarøktarfrøðingum, fáa eisini heimahjálp.
Men Annika Olsen leggur dent á, at tá ið hon sigur, at ongin bíðilisti er, merkir tað ikki tað sama sum, at allir borgarar fáa teir tímar og ta hjálp teimum tørvar.
Hon sigur nevniliga, at tað er munur á tørvinum sum er og teimum tímum, sum verða veittir.
Hon sigur, at her er bara talan um heimahjálp, tí sambýli eru ikki tald við.
– Á sambýlum búgva 159 fólk, sum fáa heimatænastu frá Almannaverkinum, sigur Annika Olsen.
