Tað var, tá tann 44 ára gamli laksaalarin og stjórin á Rækjuvirkinum á Oyri varð valdur at umboða Sambandsflokkin fyri Eysturoyar valdømi.
Tað gekk skjótt uppeftir í flokkinum, tí longu tvey ár seinni vóru boð eftir nýggjum formanni, tá Pauli Ellefsen legði frá sær og boðaði frá, at hann ikki stillaði uppaftur. Tí var tað við Edmundi á odda, at Sambandsflokkurin fór til val í 1990.
Fyrsta skeiðið hjá Edmundi var at vera andstøðuleiðari – og eftir sermerkta løgtingsvalið í juli í 1994 var Sambandsflokkurin størsti flokkur, og Edmund Joensen gjørdist løgmaður aftur drúgvar og tungar samráðingar, har í minsta lagi tvey samgonguskjøl millum minst fimm flokkar vórðu skrivað.
Edmund Joensen hevur roynt alt í føroyskum politikki – uttan at vera landsstýrismaður.
Hann hevur verið løgtingsmaður, løgtingsformaður, løgmaður og fólkatingsmaður.
Men hann hevur ikki altíð havt so lætt í flokkinum, har ymsir vargar hava spælt honum neisur. Meðan hann var løgmaður fekk hann stóran part av flokkinum ímóti sær – og hildið varð, at hann fór at fella á valinum í 1998. Men so var ikki.
Aftur varð kvett gjørt móti honum í 2001, tá tey stillaður Lisbeth L. Petersen upp ímóti honum til formansvalið í flokkinum. Tað stríðið vann Lisbeth.
Stríðið hevur helst styrkt Edmund Joensen. So sterkur er hann nú, at ikki ein gong Kaj Leo Holm Johannesen, løgmaður, megnaði at vinna fólkatingsessin frá honum á valinum fyri tveimum árum síðani.
