Tað er stórt virksemi í Eysturoy, og tað sæst aftur í skattinum, sum rennur niður í kommunukassarnar.
Í miðal er vøksturin í kommunuskattinum kring alt landið trý tey fyrstu fjórðingsárini 6,38 prosent.
Í kommununum í Eysturoy er vøksturin væl størri, enn hann er í miðal í øllum kommununum. Í onkrari kommunu er hann tvífalt so stórur, sum hann er í miðal kring alt landið.
Vøksturin í kommunuskattinum í Eysturoy er sammett við trý tey fyrstu fjórðingsárini í fjør 31,4 milliónir krónur.
Kommunurnar í Eysturoy eru Fuglafjarðar, Eystur, Runavíkar, Nes, Sjóvar, Eiðis og Sunda kommuna (sum ein partur av eisini er í Streymoy).
Størsta vøksturin í krónum eigur Runavíkar kommuna, sum hevur fingið 9,66 milliónir fleiri í kommunukassan tíðarskeiðið januar-september enn sama tíðarskeið í fjør.
Í hinum kommununum er vøksturin hesin:
Fuglafjarðar 5,59 milliónir
Eystur 5,48 milliónir
Nes 3,66 milliónir
Sjóvar 2,28 milliónir
Eiðis 1,61 milliónir
Sunda 3,11 milliónir.
Lutfalsligi vøksturin er hesin:
Fuglafjarðar 13,78 %
Eystur 10,15 %
Runavíkar 9,46 %
Nes 12,67 %
Sjóvar 10,29 %
Eiðis 11,05 %
Sunda 7,17 %
