Undirskotið á fíggjarlógini verður 235 milliónir krónur næsta ár. Tað eru góðar 70 milliónir krónur meira enn higartil ætlað.
- Vit brúka fleiri pengar til íløgur, fyri á tann hátt at seta ferð á búskapin, sigur Jørgen Niclasen, landssstýrismaður í fíggjarmálum, sum fyrrpartin legði fram fíggjarkarmarnar fyri næstu fimm árini.
Sambært fíggjarkørmunum verða íløgurnar næsta ár 323 milliónir krónur. Flestu pengarnir fara til Marknagilsdepilin, Viðareiðistunnil og útbyggingar á Landssjúkrahúsinum.
Hóast hækkandi íløgukarm hevur landsstýrið ikki mist vónina um yvirskot á fíggjarlógini í 2016.
Sambært fíggjarkørmunum verður gongdin hendan:
2014: 235 milliónir í undirskoti
2015: 168 milliónir í undirskoti
2016: 3 milliónir í yvirskoti
Landsstýrið ætlar at krevja inn 145 milliónir krónur í tilfeingisgjaldi frá fiski- og alivinnuni næsta ár.
Málið hjá Sambandsflokkinum um fleiri pengar úr Danmark er tó slept.
- Vit fara til samráðingar við donsku stjórnina um at prístalsviðgera ríkisveitingina næstu trý árini, sigur Jørgen Niclasen.
Tað merkir á vanligum føroyskum, at ríkisveitingin hækkar eini 8-10 milliónir krónur um árið, næstu trý árini.
