Í kvøld møttust Hillerød og Fredericia í dysti í næstbestu donsku fótbóltsdeildini á heimavøllinum hjá Hillerød.
Daniel Johansen og Adrian R. Justinussen byrjaði inni fyri Hillerød, og fyri fyrstu ferð í fleiri vikur var Mattias H. Lamhauge við í hópinum hjá Fredericia. Mattias var tó á beinkinum.
Tá 26 minuttir vóru leiktir fekk Adrian ein gyltan møguleika at leggja Hillerød á odda 1-0 upp á brotsspark, men ólukkutíð brendi Adrian brotssparkið.
HER ber til frá Viasat Sport at síggja brotssparkið Adrian sendi uppum málið hjá Fredericia.
Sjey minuttir seinni legði Fredericia seg á odda 1-0, og tað endaði við, at liðið úr Eysturjútlandi vann dystin 3-0. Fredericia skoraði tvey mál seinasta korterið av dystinum.
Fredericia er næstfremst í deildini við 19 stigum. Tó eru teir níggju stig aftanfyri oddaliðið, OB sum hevur 28 stig.
Hillerød er triðaftast í deildini við 12 stigum.
Komandi leygardag klokkan 14 hevur Fredericia heimadyst móti B93, og dagin eftir klokkan 12 spælir Hillerød dyst á útivølli móti Esbjerg.
