Eisini í Føroyum, í Løkshøll, seta vit altjóða handikapdagin í fokus. Á fyrsta sinni hátíðarhalda vit altjóða handikapdagin, sum ST hevur lýst at verða 3. desember á hvørjum ári.
Í Løkshøll verða fleiri áhugaverdir persónar at lýða á. M. a. Lisbeth Zornig Andersen, ið júst hevur givið út bókina Zornig og sum er kendur ummælari og kommentator í donskum miðlum, og Tóra við Keldu. Lisbeth fer at greiða frá síni tíð sum stjóri á Specialisterne, har flestu starvsfólkini hava autismu, og Tóra fer at greiða frá sínum royndum, bæði í gerandislívi og sum svimjari.
Annika Olsen, landsstýriskvinna setur dagin. Jón Brian Hvidtfeldt verður orðstýrari og teknmálstulkar tulka allar framløgurnar.
Borðreitt verður eisini við tónleiki, frukt og kaffi. Tiltakið er ókeypis.
