Í annaðkvøld heldur hon fyrilestur í hølunum hjá Starvsmannafelagnum um fólk, sum eru vaksin upp í familju við alkoholøtrupulleikum.
At vaksa upp í eini familju, har alkohol ella onnur rúsevni valda, kann elva til nógvar ymiskar trupulleikar, bæði í barnaárunum og ungdómsárunum; men ikki minst seinni í lívinum.
Kristina Hermann kemur úr Danmark. Hon er Cand. Psych og psyko-terapeutur og hon hevur hollar royndir innan viðgerð fyri avvarðandi hjá alkoholikarum.
Fyrilesturin vil lýsa teir mest vanligu trupulleikarnar, ein kann hava sum vaksin. Allar vísindaligar kanningar skjalprógva, at børn, ið vaksa upp í eini familju við slíkum bindingum, hava eitt lágt sjálvsvirði, duga illa at hava umsorgan fyri sær sjálvum, men eru alt ov trúgv og umhyggin mótvegis øðrum. Tey kunnu hava trupulleikar við at knýta seg seg til onnur og at hava tætt samband við onnur menniskju. Tey kunnu bera seg ógvusliga at kensluliga, tá ið tey kenna seg svikin og í sambandi við at taka í móti atfinningum. Tey kunnu hava fatan av, at tey skulu klára alt sjálvi, tá ið tey hava mótgongd í lívinum, og kenna seg virðisleys fyri øðrum. Tey flestu, sum eru vaksin upp í heimum við slíkum trupulleikum, hava í størri ella minni mát ment »pínukropsatburð«.
