Amerikanska álopið á trý iransk kjarnorkuverk hevur kanska ikki verið so oyðileggjandi, sum amerikanski forsetin, Donald Trump, hevur sagt.
Tað vísir ein fyribils meting frá verjufregnartænastuni DIA undir amerikanska verjumálaráðnum eftir álopini sunnudagin á kjarnorkuverkini í Fordow, Isfahan og Natanz.
Tað skriva CNN, New York Times og tíðindastovan Reuters. Tey nevna ónevndar keldur við vitan um frágreiðingina.
Metingin er fyribils og kann broytast. Tó vísa fyrstu úrslitini, at kjarnorkuætlanin hjá Iran bert er seinkað nakrar fáar mánaðir, skriva fjølmiðlarnir.
Ónavngivnu keldurnar siga, at DIA-metingin vísir, at bert inngongdin til Fordow-anleggið, sum er bygt inn í eitt fjall, varð oyðiløgd, meðan bygningarnir undir jørðini eru intaktir.
DIA-metingin bendir eisini á, at Iran hevði flutt ríkað uran til onnur støð áðrenn álopið, sigur ein av keldunum við CNN.
Eftir amerikansku álopini um vikuskiftið við kraftmiklu bunkarbumbunum, segði Donald Trump, forseti, at kjarnorkuætlanin hjá Iran var “fullkomiliga oyðiløgd”.
Áðrenn álopið mettu amerikansku fregnartænasturnar, sambært New York Times, at Iran fór at kunna gera eina kjarnorkubumbu um tríggjar mánaðir.
Frágreiðingin hjá DIA metir, at kjarnorkuætlanin er seinkað minni enn seks mánaðir, skrivar New York Times.
Hvítu Húsini vátta, at fyribilsmetingin er til staðar. Men talskvinnan Karoline Leavitt kallar tað fyri "avgjørt skeivt" fyri CNN.
Sambært Leavitt er tað "flokkað sum topployniligt, men er likiið til CNN av einum dulnevndum og tapara á øðrum stigið í fregnartænastuumhvørvinum."
Sambært Reuters verður tað væntandi ein trupul uppgáva at meta um skaðarnar á anleggini.
Stjórin í altjóða kjarnorkustovninum, IAEA, Rafael Grossi, heitti týsdagin á Iran um aftur at loyva vitjanum av eftirlitsfólkum hjá stovninum á iranskum kjarnorkuverkum.
Eftirlitsfólkini høvdu seinast atgongd til kjarnorkuverkini í Iran nakrar dagar undan álopinum hjá Ísrael á Iran 13. juni.
/Ritzau/
