Í vár samtykti býráðið í Nes kommunu at taka av tilboði frá Innspark um at keypa nýggjan útbúnað til spæliplássini í Tofta skúla og Barnagarðinum á Svangaskarði.
- Gjørd er ein heildarætlan fyri útiøkið við skúlan, og í summar varð so fyrsta byggistigið framt í sjálvum skúlagarðinum. Talan er samanlagt um eina sera stóra íløgu, og tí er neyðugt at taka hetta í stigum.
Tað siga tey í Nes kommunu í dag.
Í Barnagarðinum varð annars byrjað í fjør, og í summar varð so hildið fram. Nú er eisini komin nýggjur útbúnaður til vøggustovuna
- Í fjør varð eisini ein stór íløga gjørd í spæliplássið í nýggja Frítíðarskúlanum, og eisini her var Innspark veitari.
Lagt verður aftrat, at við hesum íløgum ynskir býráðið í Nes kommunu at raðsfesta og stimbra umstøðurnar hjá børnunum, tá ið tey eru uttandura.
Fyrrapartin í gjár var fundur á kommunuskrivstovuni, har Hans Korsgaard, stjóri í Innspark, avhendaði arbeiðini til Súna í Hjøllum, borgarstjóra í Nes kommunu.
- Vit takka Innspark fyri sera gott samstarv, siga tey í Nes kommunu í dag.
##med2##
