Tríggir dystir í 27. og síðsta umfari í næstbestu deildini eru í kvøld. Fyrsta bríksl í øllum trimum støðum verður klokkan 19. Dystirnir eru KÍ – 07 Vestur, NSÍ – Víkingur og B36 – EB/Streymur.
Serligan áhuga í kvøld hevur tað, um tað verður KÍ ella EB/Streymur, sum saman við 07 Vestur fer at flyta niður í 2. deild.
KÍ er undir strikuni við 23 stigum og málmuninum -29, og EB/Streymur er á áttanda plássi við 25 stigum og málmuninum -50.
Um tað eydnast EB/Streymi at vinna fulla úrtøku í Gundadali ímóti B36, so fer EB/Streymur at varðveita plássið í 1. deild. Um KÍ vinnur í kvøld ímóti 07 Vestur, og EB/Streymur ikki vinnur ímóti B36, so flytur EB/Streymur niður.
Merkisvert er tað, at EB/Streymur hevur fingið Rógva Egilstoft heim úr Spania at vera við í bjargingarroyndini í kvøld.
Á KÍ liðnum er Páll Müller tann einasti, sum seinastu ferðirnar hevur verið á listanum hjá besta liðnum. Har er eisini Dávid B. Andreasen, sum fyri nøkrum vikum síðani gavst á besta liðnum.
B71 – ÍF og Skála – AB hittast í morgin.
Í kvøld kl. 19.00
KÍ – 07 Vestur: Høgni Madsen
NSÍ – Víkingur: Niklas Petersen
B36 – EB/Streymur: Kári J. á Høvdanum
Í morgin
Skála – AB: Áki Leitisstein Hansenkl. 16.00
B71 – ÍF: Eiler Rasmussen kl. 13.00
