Klokkan 17.50 fer KÍ ferðalagið í luftina umborð á flogfari hjá Atlantsflog við kós ímóti Oslo. Í morgin fer ferðalagið víðari við leiguflogfari við kós ímóti Montenegro, har dystur í Europa Conference League verður mikukvøldið klokkan 20.
Nú KÍ ferðalagið er á flogvøllinum verður gjørt alment, at KÍ og Jóannes Bjartalíð hava skrivað undir nýggjan sáttmála, sum ber við sær, at Jóannes Bjartalíð fer at spæla við KÍ í hvussu so er fram til og við 2024.
Jóannes Bjartalíð fylti 26 ár í síðstu viku. Hann hevur bara umboðað barndómsfelagið, har hann fyrstu ferð var á besta liðnum í landskappingini í 2015, og síðani hevur hann verið fastur maður mest sum alla tíðina. Faroesoccer.com veit at siga, at Jóannes hevur spælt 198 landskappingardystir á besta liðnum, har hann hevur skorað 94 mál. Í kappingini um løgmanssteypið hevur hann spælt 20 dystir og skorað 10 mál, hann hevur spælt tríggjar stórsteypadystir og skorað eitt mál, og í Europa hevur hann higartil spælt 13 dystir og skorað fýra mál.
Tað vil siga, at hann hevur spælt 234 dystir í fremstu røð fyri KÍ, og at hann í teimum hevur skorað 109 mál.
Higartil hevur Jóannes Bjartalíð spælt 21 A-landsdsytir og skorað tvey mál, og hann hevur spælt 18 U-21 landsdystir og fýra U-17 landsdystir.
KÍ skrivar soleiðis:
Vit eru errin av, at vit hava ment leikarar sum Jóannes. Hanann hevur, síðani hann var heilt ungur, meiri ella minni verið fastur maður á liðnum. Við framúr bóltførleika, taktiskum snildi og hørðum arbeiði hevur hann ment seg til at vera ein av okkara leiðandi leikarum.
