Tað sær út til, at seinastu dagarnar við mótmælisgongunum í Bretlandi fara at halda fram í dag.
Hetta skriva fleiri bretskir miðlar.
Mótmælini eru vorðin til ófrið í fleiri pørtum av Bretlandi, eftir at tríggjar gentur vórðu dripnar í einum kníválopi mánadagin, meðan tær vóru á verkstovu hjá Taylor Swift á einum dansiskúla í Southport.
Sunnudagin endaðu yvir 90 fólk við at verða handtikin.
Í býum sum Liverpool, Bristol og Manchester hevur tað elvt til álop á løgregluna og rán í handlum, skrivar BBC.
Nógv av mótmælunum verða lýst av bretskum miðlum sum "anti-immigration mótmæli". Islamofobiskir lovsangir hoyrdust millum luttakararnar.
Eisini hava fleiri mótmælisgongur verið ætlaðar.
Tað er ein 17 ára gamal drongur, sum eitur Axel Rudakubana, sum er ákærdur í málinum. Hann er ákærdur fyri trý morð og tíggju drápsroyndir.
Eftir knívaálopið vóru søgur í fleiri pørtum av Bretlandi um, at gerningsmaðurin var muslimur og friðskjólsøkjari, sum júst var komin til landið.
Tær leysasøgurnar førdu millum annað til, at ein moska í Southport varð álopin.
Rudakubana er føddur í Cardiff av rwandaskum foreldrum, hevur Sky News síðani skrivað.
Tað er ikki greitt, hvat eitt møguligt motiv kundi verið.
Bretska stjórnin hevur lagt dent á fyri BBC, at hon ikki ætlar at góðataka ófriðin, og at tað fær avleiðingar fyri tey, sum eru við.
Í summum førum hava ófriðarfólk kastað múrsteinar, fløskur og blásarar eftir løgreglufólki. Fleiri løgreglufólk hava fingið skaða av hesum.
Higartil hava bretskir myndugleikar givið English Defence League skyldina fyri at hava elvt til ófriðin.
English Defence League verður lýst sum ein radikalur høgravendur bólkur, hvørs stuðlar hava verið knýttir at fótbóltshuliganismu.
Bretska stjórnin stuðlar undir, at løgreglan tekur øll neyðug stig "fyri at halda okkara gøtur tryggar", hevur bretski forsætisráðharrin, Keir Starmer, gjørt greitt.
/ritzau/
