Ein av føroysku bygdunum sum hevur megnað at nøkta tørvin á barnaansing er Miðvágs kommuna.
Hetta forðar tó ikki kommununi í at hyggja frameftir og seta ætlanir í verk á hesum øki.
- Helst skuldi ein nýggjur barnagarður staðið liðugur um hálvttriðja ár, fær Sosialurin upplýst úr Miðvágs kommunu.
Hesin nýggi barnagarðurin er prosjekteraður og lendið til hann er haraftrat keypt á Stórutrøð tey nevna, beint við Heilsumiðstøðina.
Sum skilst er ætlanin at byrja uppá arbeiðið í hesum árinum.
Selja aftur
Skipanin við barnaansingini í bygdini er býtt upp í trý, - við dagrøkt, einum barnagarði í Miðvági og einum ansingartilboði á Vatnsoyrum.
Kommunan hevur samstundis staðfest at fólkatalið í kommununi hevur verið støðugt og vaksandi seinnu árini, og at tørvur tí hevur verið á fleiri grundøkjum.
Arbeitt hevur verið við eini útstykkingarætlan í Vatnsoyrum og einari í Miðvági, har kommunan arbeiðir við at ognartaka sær lendi til endamálið.
Fyri samstundis at kunna nøkta tørvin á ansingarplássum, samtykti bygdaráðið í farnu viku at byggja eini hús á einum av kommunalu grundøkjunum norðuri í Heiðum.
- Vit eru snøgt sagt noydd at finna eina haldgóða loysn, inntil nýggi barnagarðurin verður liðugur, verður sagt.
Ætlanin er, at tey elstu børnini í barnagarðsaldri skulu halda til í hesum húsunum, ið ætlanin seinni er at selja.
Bygdaráðið hevði frammanundan kannað fleiri møguleikar fyri eini loysn. Hetta varð kortini tann ætlanin sum varð vald.
- Her hevur kommunan møguleikan at selja húsið aftur, og sostatt fáa íløguna innaftur, verður sagt.
