Tað gekk akkurát hjá Hákuni West av Teigum og liðfeløgunum í Füchse Berlin í Champions League dysti á heimavølli í kvøld.
Í Max Schmelling høllini eydnaðist tað Füchse Berlin at vinna 32-31 á rumenska liðnum, Dinamo Bukarest. Tobias Grøndahl skoraði sigursmálið við einum brotskasti beint áðrenn hallarlúðurin ýldi. Füchse Berlin var aftanfyri 16-18 í steðginum, og tað leikaði javnt á allan seinna hálvleik.
Hákun var effektivur í kvøld. Hann fekk fýra málmøguleikar, og hann setti allar í netið. Mathias Gidsel var toppskjútti hjá Füchse Berlin við 11 málum.
Füchse Berlin er fremst í bólki A við átta stigum fyri fýra dystir.
Komandi sunnudag klokkan 15.30 hevur Füchse Berlin dyst í Max Schmelling høllini. Tá verður talan um dyst í bundesliguni móti Minden.
