-Eg eri ikki “match­vinnari”

-Sjálvt um eg skori einasta málið í dystinum, so eri eg ikki “match-vinnari”. Vit vun­nu steypafinaluna sum eitt lið, og ikki sum ein­stak­l­ingar, segði ein lítillátin Sorin Anghel eftir dystin.
Sorin Anghel metti ikki at tað var stórur munur á liðu­num, men at royndirnar komu sundalagsmonnum til góðar í steypafinaluni. Hetta var fjórða steypafinalan hjá EB/Streymi, og sambært Sorin vóru tað hesar royndir, sum gjørdu útslagið.
-ÍF spældi væl, meðan vit ikki rættuliga fingu glið á okkara spæl. Men tá alt kem­ur til alt, so vinna vit 1-0, og tað er tað sum hevur týdn­ing, segði málskjúttin hjá sunda­lags­monnum.
Sundalagsmenn taptu steypa­finaluna í fjør, tá Vík­ing­ur vann 3-2, og sam­bært Sorin Anghel hev­ur eisini nógv verið tosað í sund­a­lag­num um finalu­tap­ið í fjør.
-Vit tosaðu nógv um tapið í steypafinaluni í fjør, og vildu fyri alt í verðini ikki standa í somu støðu aftur í ár. Tað ráddi um hjá okkum at standa væl sum lið, og strí­ð­ast fyri hvørjum øðrum, og tað eydnaðist væl, segði ein sera fegin Sorin Anghel at enda.