Floytan hevur ljóðað fyri seinastu ferð. Tvey stig afturat eru komin í hús. Enn ein arbeiðsdagur á vøllinum er lagdur afturum. Og nøsirnar venda móti skiftingarrúminum eru allir vitandi um, at avgerðin fellur ikki fyrr enn um tríggjar vikur.
Neistin greiddi í gjár sína skyldu í grannauppgerðini móti Kyndli. Leiðslan hjá bláa høvuðsstaðarfelagið var – burtursæð frá einu løtu í seinna hálvleiki – ongantíð hótt, og sigurin var fult uppiborin. Men tað hevði ikki stórvegis týdning í morgun. Nú bíða neistafólk eftir avgerandi dystinum um finaluplássið, sum verður leiktur 29. mars.
Eingin ivi
Neistin var við yvirlutan í stórum løtum av dystinum í gjár. Grannarnir úr Kyndli royndu at taka ferðina úr dystinum, men neistamenn lótu seg ikki ávirka. Við skjótum og hugflogsríkum álopsspæli hevði verjan hjá grannunum ofta bestan hugin bara at hyggja at.
Fyri viku síðani gjørdi Torvald Abrahamsen úr Kyndli greitt, at teir skuldu í øllum førum syrgja fyri, at Neistin ikki sleppur í finaluna. Spenningurin undan dystinum var eisini, um Kyndil kundi leggja fót fyri grannunum. Men tað sást tíðliga, at tað fóru teir ikki.
Royndu at hótta
Kyndil royndi at hótta leiðsluna eftir steðgin, og einu løtuna vóru teir heilt nær við. Men í løtum tóktist tað, sum teir einans høvdu dómaraavrikið í huganum. Við fýra minuttum eftir at spæla, var Neistin á odda við trimum málum, 25-22. Og tá Kyndil misnýtti upplagdan møguleika at koma enn nærri, slapp bláa helvtin av høvuðsstaðnum avstað.
Hans Áki Dal-Christiansen var hesa ferð undangongumaður hjá Kyndli. Hann stóð í alt fyri 11 av málunum hjá teimum grønu.
Neistin vann tá avtornaði 29-22, og hóast sjálvt spælið ongantíð var í hásæti, var breiddin hjá steypavinnarunum teimum til greiðan fyrimun.
Nú skal alt avgerast
Neistin kann nú gera klárt til finaluna undan finaluni. Tann 29. mars verður avgerandi dystur millum teir bláu og H71, har vinnarin helst vinnur sær sæti í finaluni.
Neistin, sum hevur havt takið á hoyvíkingum í ár, bíðar framvegis eftir endaligu avgerðini um dystin móti VÍF. Vinnur bláa høvuðsstaðarfelagið ikki tey stigini, hava teir brádliga ryggin móti múrinum.
Men føroyameistararnir eru í øllum førum til reiðar at varðveita føroyameistaraheitið!
----
FAKTA um dystin
Neistin-Kyndil 29-22 (15-11)
10 min: 4-4
20 min: 11-8
30 min: 15-11
40 min: 21-15
50 min: 23-20
Málskjúttar
Neistin: Jugoslav Djumic 8, Karl Herup Olsen 5, Birgir Poulsen 5, David Edvardsen 3, Tróndur Kragesteen 3, Blagoje Buha 2, Finnur Hansson 2, Karl Odmar Rasmussen 1
Kyndil: Hans Áki Dal-Christiansen 11, Jónleif Sólsker 3, Janus Einar Sørensen 3, Bárður Johannesen 2, Hans Arni Thomsen 2, Torvald Abrahamsen 1
Brotskøst: Neistin 2, Kyndil 8
Útvísingar: Neistin 2, Kyndil 4
Dómarar: Kristian Johansen & Heri Petersen
