- Komið til Húsavíkar og roynið eitt øðrvísi tónleikatiltak. Vit føroyingar eru tiltiknir fyri at duga væl at syngja - og ikki minst at syngja við.
Við íblástri frá spennandi tiltøkunum í Gøtu, eitt nú Hoyma, fara tey í Húsavík at taka tað besta frá tveimum pørtum.
- Komið inn í gomlu húsini í Húsavík, eitt nú við Ánna, Skumpitoft, Fløtt og í Toft, tí her bíðar tónleikarin, sum fer at leiða felagssangin.
Víst verður á, at sangurin verður skipaður við ávísum tema'um, eitt nú við føroyskum fosturlandssangum, norðurlendskum sangjum og írskum sangjum, soleiðis at í tí einstaka húsinum er tað eitt ávíst slag av sangi sum verður sungið.
- Dugir tú ikki allar sangirnar, bilar tað einki, tí sanghefti eru í øllum húsunum. So, tað er bara at syngja.
Eisini verður farið uppá gólv í gomlu húsunum á Jógvansbreyt, sum fyrr var staðið, har dansað var, tá eitt nú brúdleyp vóru í bygdini.
- Alt tiltakið endar við felagssangi aftur við einum góðum súpanartallerki.
Lagt verður aftrat, at byrjað verður í kirkuni leygardagin hin 21. mars klokkan 17 og síðani verða húsini opin.
- 15 minuttir verða millum, at hvørt tiltakið byrjar, og tiltøkini vara umleið 35-40 minuttir. So, um tú leggur væl til rættis, ber til at sleppa inn í eini 3-4 hús.
Stigtakararnir siga, at skráin fyri hetta serstaka tiltak í Húsavík verður kunngjørd nakrar dagar frammanundan tiltakinum.
