Ungarn skal avtaka forboðið hjá løgregluni móti at halda pride-gongu í høvuðsstaðnum Budapest leygardagin.
Tað eru boðini frá forkvinnuni í ES-nevndini, Ursulu von der Leyen, í kvøld í einum uppslag á sosiala miðlinum X.
- Eg heiti á ungarsku myndugleikarnar um at loyva Budapest Pride at verða, skrivar hon.
- Hvørki fyrireikarar ella luttakarar skulu óttast revsitiltøk, stendur framvegis.
Fyriskipari av pride'ini hetta vikuskiftið, har tíggjutúsundavís væntast at luttaka, er LGBTQ-samfelagið í Ungarn.
Løgreglan bannaði pride-gonguni fyri einari viku síðani.
Hetta hendi eftir at ungarska tjóðartingið samtykti eina lóg í mars, sum gevur løgregluni grundarlag fyri at banna LGBTQ skrúðgongu. Endamálið skuldi verja børn.
Liberali borgarstjórin í Budapest, Gergely Karácson, hevur áður upplýst, at Budapest ætlar at hava pride-skrúðgonguna hóast løgreglubannið, hóast lógin er.
- Í hesum býnum eru ikki fyrsta- ella annaðfloks borgarar. Í hesum býnum vita vit, at bert saman kunnu vit vera fræls, segði Karácson.
Hann heldur ikki, at lógin um at banna LGBTQ-skrúðgongum er galdandi fyri tiltøk, sum býarstýrið skipar fyri.
- Ráðhúsið í Budapest skipar fyri Budapest Pride gonguni 28. juni sum eitt býartiltak. Punktum, skrivaði Karácson fyri stuttum á Facebook.
Tjóðskaparligi konservativi flokkurin hjá Viktor Orban, forsætisráðharra, Fidesz, hevur stóran meiriluta av sessum í tjóðartinginum.
Stjórnin hjá Orban førir ein avmarkandi politikk mótvegis LGBTQ-samfelagnum, og forsætisráðharrin segði longu í februar, at fyrireikararnir av Budapest Pride ikki skuldu gera sær ómak at skipa fyri pride-gonguni í ár.
Umframt at banna LGBTQ skrúðgongum, loyvir nýggja lógin løgregluni at brúka andlitseyðkenning til at eyðmerkja fólk, sum luttaka í pride skrúðgongum.
/Ritzau/
