Bæði Manchester United og Manchester City taptu í fyrru 1/8 finaluni í Europa League í kvøld. Manchester United tapti á Old Trafford 3-2 fyri Athletic Bilbao, sum helst skuldi vunnu ein størri sigur. Manchester City tapti 1-0 fyri Sporting Lisbon í Portugal.
Athletic Bilbao byrjaði við sínum vanliga høga trýsti og tað eydnaðist í løtum væl at spæla seg í góðar støður. Manchester United hótti í hinum endanum við mótálopum. Miðskeiðis í fyrra hálvleiki kom heimaliðið á odda, tá Wayne Rooney fylgdi upp eftir at Javier Hernandez hevði roynt seg við skoti. Ein minutt fyri hálvleik javnaði Fernando Llorente, tá hann stútaði einn innlegg í mál.
Í seinna hálvleiki helt Athletic Bilbao fram at trýsta langt frammi á vøllinum og kom til fleiri møguleikar, men spaniólin í Manchester United málinum, David De Gea, stóð sum ein brandur.
Eitt korter fyri tíð eydnaðist tað tó Oscar at fáa bóltin framvið David De Gea í Manchester United málinum. Í uppspælinum kundi verið líkt til, at Oscar var rangstaddur.
Ein minutt fyri tíð økti Athletic Bilbao til 3-1 við Iker Muniain, men í yvirtíðini minkaði Wayne Rooney um munin við brotssparki.
Manchester City spældi fyrr í dag móti Sporting Lisbon í Portugal. Einsamalla málið í dystinum skoraði Xandao fyri Sporting Lisbon við hælsparki. Manchester City skal tí vinna returdystin á Etihad leikvøllinum um oddaliðið í Premier League ætlar sær víðari.
Europa League 1/8 finalur:
Manchester United Ath Bilbao 2-3
Atletico Madrid Besiktas 3-1
FC Metalist Olympiakos 0-1
FC Twente Schalke 04 1-0
AZ Alkmaar Udinese 2-0
Standard Liege Hannover 96 2-2
Valencia PSV 4-2
