Evangeliihúsið í Havn varð tikið í nýtslu 21. mai 1983. Í leiðsluni tá vóru Leivur Christiansen, fyristøðumaður og Otto Holm, Ólavur Højgaard og Andrias Jacobsen elstar.
– Í samkomuni eru nógvar ungar familjur og eru eisini nógv børn og ung í samkomuni. Tí verður leygardagurin 18. mai ein stórur familjudagur, har byrjað verður við morgunmati kl.9 og síðan verða bíbliutímar, aktivitetir, hugni o.a. fyri allar aldursbólkar og endar dagurin við lovsangsløtu, sigur tey í Evangeliihúsinum.
– Tey eru mong, sum hava og hava havt gleði av samkomuhúsinum, har boðskapurin um Jesus hevur verið boðaður. Samkoman hevur verið og er vælsignað við nógvum góðum sangkreftum, og hevur sangur og tónleikur altíð verið ein partur av møtunum, sum hava verið og eru hvønn sunnumorgun, siga tey.
Norðmaðurin T. B. Barrat grundlegði Hvítusunnurørsluna í Norðurlondum. Í 1923 kom hann til Føroya. Í byrjanini savnaðust fólk í heimunum, men í 1947 fekk samkoman hús í Tróndargøtu 36 í Tórshavn, har salurin var tikin í nýtslu í november 1949.
Í dag eru tað trý ung hjún, sum eru í leiðsluni í Evangeliihúsinum.
Í sambandi við hátíðarhaldið verður:
Leygardagin 18. mai familjudagur frá kl. 9. og sunnudagin 1. hvítusunnudag 19. mai kl. 11 familju- og morgunmøti.
