Leygardagin var fjallasúkklukapping í Vágum, sum var á einum teini úr Vatnsoyrum norður til Fjallavatn. Teinurin varð súkklaður tríggjar ferðir aftur og fram hjá teimum vaksnu og tvær ferðir aftur og fram hjá unglingunum, so samlaði teinurin var ávikavist 24 og 16 kilometrar.
Hjá monnum vann Gunnar Dahl-Olsen við tíðini ein tími, 9,38 minuttir, og smáar tveir minuttir eftir hann kom Torkil Veyhe á mál, ein minutt framman fyri Andras Joensen, ið aftur var hálvanfjórða minutt framman fyri Sigmund Olsson. Kári Olsen, ið var fimtur á mál, vann kappingina hjá »Old Boys«.
Teir báðir unglingarnir, ið vóru við, fylgdust sera væl, og endaspurturin millum teirra gjørdist sera spennandi. Tóri Nielsen kom á mál við tíðini ein tími og 11,15 minuttir, og bara eitt sekund seinni kom Jóanis Albert Nielsen á mál.
Hetta var triðju ferð, at kappast varð í H&G MTB Cup 2010, og kappingin leygardagin var tann, ið upprunaliga skuldi vera 1. mai, men tá bleiv útsett.
