Talið á føroyingum við góðari løn, er veksandi. Tað vísir ein uppgerð hjá Hagstovuni yvir inntøkurnar hjá føroyingum.
Í fyrru atløgu hevur Hagstovan kannað, hvussu høga løn, fólk hava tilsamans, ella áðrenn skatturin er drigin frá.
Uppgerðin vísir, at ein lítil helvt av øllum yvir 15 ár liggja ímillum 0 og 200.000 krónur í bruttoinntøku.
Ein stórur triðingur av øllum yvir 15 ár, liggur ímillum 200.000-400.000 krónur í inntøku.
Hinvegin hava góð 17 prosent eina inntøku ímillum 400.000 kr. og 1 millión, og 1,2 prosent av øllum yvir 15 ár, ella tilsamans 461 fólk, høvdu eina inntøku yvir eina milliónina í 2012, áðrenn ið skatturin er drigin frá.
Hagstovan hevur eisini hugt eftir inntøkuni hjá fólki aftan á at skattur er drigin frá, og tað hevur broytt tølini eitt sindur.
Verður hugt eftir inntøkuni, áðrenn skatt, vóru næstan 17.000 føroyingar í teimum báðum niðastu bólkunum, og sum altso hava eina inntøku í millum 0 og 200.000 krónur um árið.
Les eisini: Fátækradømið í Føroyum er veksandi
Men tá ið skatturin er drigin frá, sæst, hvussu tann tøka inntøkan er, og nú vísir myndin, at yvir 25.000 føroyingar yvir 15 ár eru í somu bólkum.
- Hetta svarar til, at 68 prossent hava eina tøka inntøku ímillum 0 og 200.000 krónur og 29 prosent hava eina tøka inntøku ímillum 200.000 og 500.000 krónur.
Restin, sum eru eini trý prosent hava yvir 500.000 krónur í tøkari inntøku og 115 føroyingar yvir 15 ár, høvdu yvir eina millión eftir at brúka, tá skatturin var goldin.
Í 2010 vóru tað 35 føroyingar, sum høvdu yvir eina millión eftir í tøkari inntøku, tá ið skatturin var goldin, sigur Hagstovan.
|
