Fólkatingslimur eigur ikki at kunna fáa farloyvi við løn fyri at møta í Løgtinginum í Føroyum ella í Landstinginum í Grønlandi og harvið fáa dupulta løn.
Tað halda Danmarksdemokratarnir og Karina Adsbøl, limur floksins í fólkatingsins formansskapi, sum tí fara at leggja fram uppskot um at broyta fólkatingsvallógina.
- Vit halda tað vera djúpt órættvíst, at tá tú ikki fylgir tínum uppgávum og situr í einum øðrum tingi - so skalt tú fáa dupulta løn.
- Hetta er ikki ein rættvís nýtsla av skattaborgarans pengum, sigur Karina Adsbøl.
Danmarksdemokratarnir fá stuðul frá SF.
- Eg haldi, at vit eiga at harmonisera donsku reglurnar við tær føroysku og tær grønlendsku, so tú ikki fært dupult, sigur Karsten Hønge, sum umboðar SF í formansskapinum í Fólkatinginum.
Karina Adsbøl hevur seinastu tíðina fingið fleiri fólkatingsvar frá Forsætismálaráðnum, har reglurnar í Føroyum og Grønlandi eru endurskoðaðar.
Í Føroyum er lógarbroyting ávegis, soleiðis at tað frá næsta løgtingsvali ikki longur ber til at fáa farloyvi við løn frá Lagtingetinum at sita á fólkatingi, upplýsir Løgtingið.
Í Grønlandi ber eins og í Danmark og Føroyum til at fáa loyvi frá landstinginum, Inatsisartut, at røkja sínar uppgávur sum fólkatingslimur. Men tað farloyvið er uttan løn.
Soleiðis er ikki í Danmark, har fólkatingslimur hevur rætt til at søkja um farloyvi og fáa fulla løn við at grundgeva fyri tí við, at viðkomandi skal møta á fundum sum limur í til dømis Inatsisartut.
Tað hevur grønlendski fólkatingslimurin Aki-Matilda Høegh-Dam úr flokkinum Naleraq gjørt.
Í september fekk hon farloyvi við løn av fólkatinginum fyri at luttaka á Inatsisartut heystsetuni, har hon eisini fær løn, eftir at hon varð vald á valinum í Grønlandi í mars.
Tilsamans gevur dupulta lønin eina mánaðarløn á stívliga 125.000 krónur, svarandi til eina ársløn á stívliga 1,5 milliónir krónur, hevur Ekstra Blaðið áður lýst.
Samstundis fær varakvinna hennara á Fólkatingi, Elvira Kûitse, eisini løn, meðan Aki-Matilda Høegh-Dam er í farloyvi við fullari løn.
Fólkatingsins Presidium, har spurningar um innanhýsis viðurskifti fólkatingsins eins og farloyvisreglur verða viðgjørdir, sita fimm limir.
Ritzau hevur roynt at fingið eina viðmerking frá øllum fimm - harímillum formanninum í Fólkatinginum, Søren Gade.
Hann vil ikki gera viðmerkingar til uppskotið frá Danmarksdemokratunum, tí hann heldur ikki, at hansara sjónarmið er viðkomandi fyri málið. Men hann er opin fyri at seta evnið á dagsskránna so tað kann verða viðgjørt, upplýsir tíðindatænastan hjá formanninum.
Leif Lahn úr Javnaðarflokkinum hevur ikki svarað fyrispurningi aftur, meðan Lars-Christian Brask úr Liberal Alliancer vil fegin síggja tað ítøkiliga uppskotið frá Danmarksdemokratunum.
- Hetta er eitt evni, sum flestu danir ella grønlendingar kanska undrast á, at tað letur seg gera. So eg haldi, at tað er viðkomandi, at tað verður umrøtt, sigur Brask.
/Ritzau/
