Sitandi forsetin í Moldova, Maia Sandu, hevur atkvøtt í øðrum umfari av forsetavalinum í Moldova í dag.
Í sama føri ávaraði hon um inntriv í valið. Hetta skrivar tíðindastovan dpa.
- Tjóvar vilja stjala atkvøður okkara og land okkara, men valdið hjá fólkinum er óendaliga størri enn allar teirra samansvørjingar, segði forsetin, tá hon atkvøddi í høvuðsstaðnum í Moldova, Kisinau.
Fleiri søgur og ávaringar hava verið um russiska uppíblanding í valið.
Trygdarráðgevin hjá Sandu, Stanislav Secrieru, hevur á sosiala miðlinum X skrivað, at myndugleikarnir í Moldova síggja "massiv inntriv" úr Russlandi.
Millum annað heldur Stanislav Secrieru, at flutningur av veljarum er skipaður í russiska sinnaða økinum Transnistria.
Sambært trygdarráðgevanum var valluttøkan í Transnistria meira enn valluttøkan í fyrra umfari klokkan 11.
Í fyrsta umfari av valinum fekk Maia Sandu 42 prosent av atkvøðunum.
Á øðrum plássi fekk Alexandr Stoianoglo úr russiska sosialistaflokkinum 26 prosent av atkvøðunum.
Av tí at einki valevni fekk kravdu 50 prosentini av atkvøðunum í fyrsta umfari av valinum, skal atkvøðast aftur.
Undir fyrsta umfari av valinum heldur løgreglan í Moldova sambært tíðindastovuni Reuters, at atkvøður vórðu keyptar. Løgreglan í Moldova heldur, at russiskt stuðlaði oligarkurin Ilan Shor stendur aftanfyri.
Løgreglan roynir at forða fyri, at tað endurtekur seg, stendur í fráboðanini.
Moldova var partur av Sovjetsamveldinum, til tað gjørdist sjálvstøðugt land í 1991.
Síðani tá hevur tað skiftandi verið yvirhøvur pro-vesturlendskt ella pro-russiskt - alt eftir verandi stjórn.
Landið hevur roynt at komið nærri Vesturheiminum í størri mun, síðani Russland herjaði á Ukraina í 2022. Ukraina hevur mark bæði til Moldova og Russland.
Tað er Maia Sandu, ið sum sitandi forseti hevur staðið á odda fyri pro-vesturlendskari kós seinastu tíðina.
Ilan Shor hevur opinbart bjóðað seg fram at gjalda fólki fyri at atkvøða ímóti Sandu, men tað avsannar hann. Sambært Reuters avsannar Russland eisini, at tað blandaði seg uppí valið.
Valhølini lata aftur klokkan 20:00 danska tíð.
/Ritzau/
