Havnin ímóti Klaksvíkini

Síðstu trý árini hevur Mjølnir vunnið alt, sum er at vinna í føroyska kvinnu­flogbóltinum, og sum tað sær út nú, hava flog­bólts­kvinn­urnar úr Klaksvík sett kósina ímóti fjórðu greip­uni. Alt kundi eisini bent á, at tað verður tvær ferðir Fleyr hinumegin netið, áðrenn vit vita, um hetta kapp­ingar­árið endar sum tey trý undan­farnu.
Status er, at Mjølnir longu langt síðani hevur tryggjað sær sæti í steypafinaluni, um­framt at liðini eftir 12 um­før er trý stig framman fyri Fleyr, sum aftur er sjey stig framman fyri næstu liðini. Fleyr hevur tí kós ímóti FM-finalunum, men er fram­vegis ein dyst frá at koma í steypafinaluna.
Í Mjølnir-kappingini hevði Fleyr, sum vinnari í Fleyr-kappingini í heyst, møgu­leikan at vinna seg í steypafinaluna, men Dráttur setti seg upp á tvørs og vann 3-0, so nú skal fyrst ein hálv­finala spælast millum tey bæði, áðrenn greitt er, hvør møtir Mjølni í steypafinaluni. Henda hálvfinalan verður í Sandoyar samkomu- og ítróttarhøll mikukvøldið 22. januar klokkan 19.30.

Dygga mótstøðu
Men hóast eitt sindur av spenn­ingin er um fina­listar­nar í steypa­kapp­ingini hjá kvinnum, er ikki júst sami spenningurin í Eik-liguni, har Mjølnir og Fleyr halda seg eitt fitt petti framman fyri næstu kappingarneytarnar, og har serliga Mjølnir sær út til at hava ein fyrimun.
Í gjár hevði Mjølnir vitjan av Drátti, men hóast úrslitið segði, at klaksvíkskvinnur vunnu 3-0, so var dysturin meira spennandi og javnur enn so. Kvinnurnar hjá Drátti hingu í og fingu nógv upp­aftur, men hóast tær vóru ser­liga nær við í teimum báð­um síðstu settunum, eydn­aðist ikki at taka sett frá Mjølni.
Fleyr fekk eisini sítt at gera í útidystinum ímóti KÍF leygardagin, tí í høllini í Kolla­firði máttu fimm sett til, áðrenn Fleyr hevði vunnið. Ta einu løtuna vann kÍF seg framum 2-1 í settum, og eisini leikaði javnt á í fimta og avgerandi settinum, ið mátti upp um 15 bóltar, áðrenn Fleyr hevði vunnið tað 18-16 og dystin 3-2.
Á Kambsdali vann TB leygardagin 3-1 á ÍF-kvinn­unum, sum vunnu fyrsta sett, men annars bara viknaðu og máttu lúta 1-3. Og í Sørvági vann SÍ í gjár 3-0 á Ternuni, sum bara í triðja setti fekk sett sín dám á dystin, uttan tó veruliga at hótta heimaliðið.