Samlaðu inntøkurnar hjá Heimamissiónini í fjør vóru 7,2 milliónir krónur í mun til 7,0 milliónir í 2017. Útreiðslurnar í 2018 vóru 6,8 milliónir krónur í mun til 6,4 milliónir árið fyri.
Í 2017 var avlopið 556.000 krónur.
Fíggjað av gávum
Roknskapurin vísir samlaðu inntøkurnar og útreiðslurnar av arbeiðinum hjá Heimamissionini. Í roknskapinum liggja arbeiðsøkini Leguhúsið í Nesvík, Heimamissiónsforlagið, Miðlaarbeiðið (Trúboðin, nú trubodin.fo), Simba (barna- og juniorarbeiðið), Eindin (familjuarbeiðið), HMU (Heimamissiónsungdómur), Sjómansmissiónin og Missión í Føroyum og uttanlands.
Heimamissiónin er fíggjað av stuðlum og gávum.
Trubodin.fo skrivar, at í 2018 vórðu millum annað fleiri útreiðslur til KT í sambandi við heimasíðuna trubodin.fo. Eyka inntøkur komu eisini av, at bókin “Lívgað sjófólk í eina øld” kom út.
Tørvar milliónir til útbygging av Leguhúsinum
Útbyggingin av Leguhúsinum í Nesvík ávirkar ikki sjálvan raksturin hjá Heimamissiónini, men verður hildin uttanfyri í eini avseting. Við ársenda 2018 vóru savnaðar inn tilsamans góðar 20 milliónir krónur, meðan brúktar eru smáar 26 milliónir krónur. Tá er keyp av lendi og øðrum íroknað.
Bankaskuldin við ársenda er umleið 11 milliónir krónur, skrivar trubodin.fo.
Mynd: mission.fo
