Tíðindabræv úr New York:
New York
Tað er skelkandi og lítið hugaligt uppliva, at samstundis sum
Sjálvstýrisflokkurin í hesum døgum á altjóða stigi saman við øllum góðum
kreftum roynir at tryggja heimsfriðin í ST, skal ófriður og stríð valda
innanflokks. Sámal Petur og Helena hava hesi seinastu árini verið við til at
mynda føroyskan politikk og prógvað sín dugnaskap, og lítidðer at ivast í, at
flokkurin hevur brúk fyri øllum góðum kreftum. Ilt er at fáa eyga á, hvat
positivt úrslit kann spyrjast burturúr at skifta leiðara, nú so stutt er
eftir av valskeiðinum. Okkum er størri tørvur á soldátum heldur enn
generalum.
Sum helst flestu vita heima, var New York Marathon sunnudagin. Umleið 30.000 luttakarar vóru við úr øllum heiminum. Stórir og smáir, høgir og lágir. M.a luttók statsministarin í Slovenia Mikulas Dzurinda. Millum 5 teir fremstu av monnunum vóru 3 úr Kenya og 2 russarar. Hjá kvinnunum
var tann fyrsta úr Etiopia, og nr. tvey og trý úr Kenya.
Fólkatingsvalið hevur sett síni spor, og tríggir fólkatingslimir sum stillað
uppaftur, tóku avgerð um at fara heim fríggjadagin. Teir hava bert tríggar
vikur til valstríðið, so teir krevja at leggja seg í selarnar fyri at fáa
eitt gott val og tryggja sær enn eitt fýra ára skeið í Fólkatinginum.
Tað er ótrúligt, sum amerikumenn eru blíðir og hjálpsamir. Tað vísir seg,
sum um teimum dámar sera væl at verða spurdir um hjálp. Av tí at vegakervið
er uppbygt vid Aveveu longs og Streets tvørs í talrekkju, kann ein nærum
ikki fara skeivur. Eg havi, fyri at koma í tal við fólk, nýtt høvið at spyrja
um ymiskt, og geva teir sær góða tíð at greiða frá tí, spurt er um. Næstan
altíð endar tað vid spurninginum, hvar ein er frá. Enn havi eg ongan hitt ,
sum veit hvat ella hvar Føroyar eru. Tað nærmasta var maðurin aftan fyri
diskin í Postal Administration FN, sum segði seg hava hoyrt navnið, og helt
at Føroyar lógu í Eystursjónum.
Týsdagin 6 november er borgarstjóraval í New York. Sjónvarpið hevur sent regluligar lýsingar frá valevnunum. Tveir liggja ájavnt í meiningskanningunum. Annar er mediamillióningurin Mike Bloomberg, sum
verdur stuðlaður av núverandi borgarstjóra og er Republikanari. Hitt er
demokraturin Mark Greene. Spennandi verður at síggja, hvussu leikur fer.
Annars má sigast, at valið er merkt av syrgiligu hendingunum 11 september,
bumbuhóttanum og herjanini av Anthrax pulvur, sum gevur eitt døkt baksýni.
Vit hava tað gott øll somul og kenna okkum trygg. Komandi vikuskifti verður hæddarpunktid í hesi 56 setuni í ST. Tá koma teir stóru at taka orðið. Sum vanligt fær Brasilia fyrst orðið og síðan verður tað amerikanski forsetin
George Bush, sum kemur at tosa í 15 minuttir. Teir fortaldu á
morgunfundinum hjá donsku sendinevndini, at ST ár 2000 hevdi roynt eina
nýggja skipan, har tríggjar lampur vóru á talarastólinum. Ein grøn lampa
lýsti, meðan tala vard, ein gul tá talutíðin var um at vera liðug og ein
reyð, tá tíðin var úti. Tá Fidel Castro leiðari á Cuba fekk orðið, legði hann
ein lummaklút oman yvir lampurnar og talaði seg lidnan. Hetta førdi til
lógvabrestir frá luttakarunum og er lítið hugsandi, at hendan skipan verður
nýtt aftur.
Eg fari at enda hesa ferð og senda bestu heilsur heim til Føroyar.
