Hetta var ein bummtúrur norðanfyri hjá suðuroyingum

Veðrið er gott at sigla norður og suður úr Suðuroy man sjáldan vera so lagaligt og slætt, sum tað var í gjár.

Bæði FC Suðuroy og TB vóru norðanfyri og spældu landskappingardyst, og bæði liðini fóru krøktir suðuraftur.

Púra óvæntað var tað, at FC Suðuroy tapti 2-0 í Gundadali ímóti teimum næstbestu hjá HB.

Tá ið fyrsti triðingur av kappingini var liðugur, hevði FC Suðuroy ikki tapt. Síðani hevur gingið av skriðuni, og í gjár tapti FC Suðuroy fjórða dystin á rað. Næsta vikuskifti verður tað grannauppgerð á Vágseiði, tá ið TB verður jóansøkugestur í Vági.

Í gjár var TB í Runavík, og har vann NSÍ stevnudystin 2-1, eftir at TB í hálvleikinum var frammanfyri við málinum, sum Mortan Hansen skoraði tíggju minuttir undan steðginum.

Eftir steðgin var Josva Signarsson tvífaldur málskjútti. Tíggju minuttir eftir steðgin javnaði hann til 1-1, og sjey minuttir undan leikloki skoraði hann sigursmálið. 18 ára gamli Josva Signarsson hevur higartil í ár skorað fýra mál í næstbestu deildini. Stevnusigurin ber við sær, at NSÍ nú er á fjórða plássi við 18 stigum.

Hjá HB var tað Silas Joensen, sum í fyrra hálvleiki var tvífaldur málskjútti. HB er á áttanda plássi við 13 stigum. Tað eru trý stig aftur til FC Hoyvík, sum er á níggjunda plássi.

Í gjár vann FC Hoyvík 4-0 á heimavølli ímóti EB/Streymi, sum er botnlið við 7 stigum. Hetta var aðru ferð í ár, at FC Hoyvík vann á heimavølli ímóti EB/Streymi. Í 9. umfari endaði tað 4-1.

Emmanuel Andorful, sum fýra tey undanfarnu árini spældi við FC Suðuroy, var málskjútti í fyrra hálvleiki. Eftir steðgin skoraði innskifti Ingolf Aron Tvørfoss tvær ferðir og innskifti Andras Nolsøe einaferð. Hjá EB/Streymi varð brekkan uppaftur brattari tveir minuttir undan steðginum, tá ið Thomas Bjørn Miezan sá gula kortið fyri aðru ferð.