Ein hollendskur kærudómstólur gevur hollendsku stjórnini boð um at steðga útflutningi av eykalutum til F-35 stríðsflogfør í Ísrael.
Tað skrivar Reuters.
Forboðið ímóti útflutninginum skal koma í gildi innan sjey dagar.
– Tað svitast ikki, at tað er greiður vandi fyri, at útfluttu lutirnir til F-35 flogfør verða brúkt til álvarsom brot á altjóða humanitera lóg, skrivar kærudómstólurin í avgerðini.
Ein dómstólur í hollendska býnum Haag gjørdi annars í desember av, at Holland kundi halda fram við útflutninginum av eykalutum til ísraelsk stríðsflogfør.
Fleiri mannarættindafelagsskapir høvdu reist málið ímóti hollendska statinum. Tey kærdu avgerðina í desember.
Mannarættindabólkarnir stúra fyri, at eykalutirnir hava ein virknan leiklut í álopunum hjá Hamas í Gazageiranum.
Tað er USA, sum framleiðir F-35 flogførini og teir hartil hoyrandi eykalutirnar.
Nakrir av lutunum verða goymdir í einum goymslubygningi í Hollandi og verða sendir haðani til Ísrael og fleiri onnur lond.
Tá ein dómstólur í desember vísti aftur at steðga útflutninginum, varð tað gjørt við tilvísing til, at ein slík avgerð er politisk.
Spurningurin um útflutning av lutum til ísraelsku stríðsflogførini er eisini reistur í Danmark.
Har hevur millum annað Amnesty Internationa funnist at, at danska fyritøkan Terma útflytur lutir til Ísraelsku F-35-flogførini.
/ritzau/
