Tjóðveldi hevur brúk fyri fýra varafólkum, sum skulu hava fast sæti á løgtingi.
Tað er greitt, nú avrátt er, at Tjóðveldi fær trý fólk í nýggja landsstýrið, har flokkurin skal umsita fíggjarmál, fiskivinnumál og heilsumál.
Av tí at Høgni Hoydal er valdur á fólkating – og tí at Tjóðveldi eins og Javnaðarflokkurin hevur lovað, at tað verður ikki sami persónur, sum røkir fólkatingsessin og løgtingsess, verður brúk fyri fýra føstum avloysaum á tingi – treytað av, at tey trý landsstýrisfólkini verða vald millum tingfólkini.
Tey fýra, sum eru næst á listanum eru:
Bjørt Samuelsen í Havn
Óluvá Klettskarð í Klaksvík
Pauli T. Petersen í Vestmanna
Ingolf S. Olsen í Sørvági.
Bjørt Samuelsen hevur royndir úr løgtinginum og landsstýrinum. Óluvá Klettskarð var landsstýriskvinna í mentamálum í tvær vikur í september í 2008, og Pauli T. Petersen hevur okkurt skiftið havt sæti sum varamaður fyri Fólkaflokkin í farna valskeiði.
Ingolf S. Olsen hevur ikki havt sæti á tingi. Hann stillaði upp á løgtingsvalinum í 2011. Tá gjørdist hann nummar 12 á listanum við 146 atkvøðum. Hesaferð var hann nummar 11 við 154 atkvøðum.
