Ísrael hevur í dag fingið tann triðja listan við gíslum, sum verða latnir leysir av Hamas sum liður í eini vápnahvíldaravtalu.
Tað skrivar bretska BBC.
Sambært ísraelska blaðnum The Times of Israel eru tað 13 kvinnur og børn, sum skulu latast leys í dag. Harumframt er eftir øllum at døma ætlanin, at sjey útlendskir ríkisborgarar eisini skulu latast leysir.
Tíðindini í blaðnum koma úr Qatar, sum hevur havt ein leiklut sum meklari í vápnahvíldini millum palestinsku rørsluna Hamas og Ísrael.
Eisini Egyptaland hevur finigð ein lista við 13 ísraelum og 39 palestinum, sum skulu latast leysir í dag. Tað sigur miðlaskrivstovan hjá stjórnini í Egyptalandi sambært tíðindastovuni Reuters.
Umbýtið seinastu dagarnar hevur tó verið merkt av óvissu um talið til tað síðsta.
Í dag kom ein annar bólkur av gíslum – 13 ísraelar og fýra teilendingar – sambært tíðindastovuni Reuters til Ísrael. Tey vóru ein partur av umbýtinum í gjár, har tað stóðst ósemja um mongdini av neyðhjálp til Gaza á vegnum.
Hamas útsetti soleiðis leyslatingini, tí rørslan ikki helt, at Ísrael helt sín part av avtaluni um neyðhjálp.
Trupulleikin varð loystur – millum annað við hjálp frá meklarunum Egyptalandi og Qatar. Tað skrivar Reuters. Ósemjan vísti, at tann fyribils fýra daga laga vápnahvíldin er skroypilig.
Sum liður í avtaluni er ætlanin, at 150 palestinskir fangar eins og 50 gíslar hjá Hamas skulu latast leysir.
Vápnahvíldin kann leingjast, um partarnir verða samdir um fleiri umbýti.
Gíslarnir hjá Hamas eru ein partur av einum bólki upp á umleið 240 fólk, sum vórðu burturflutt, tá Hamas trongdi inn í syðra part av Ísrael 7. oktober.
Har vóru umleið 1200 fólk, serliga sivil, sambært ísraelskum myndugleikum dripin.
Sløk 15.000 fólk er dripin í Gaza í álopum frá Ísrael, upplýsa palestinsku heilsumyndugleikarnir.
/ritzau/
