Ísraelskar herdeildir hava í dag lopið á eitt sjúkrahús har norðuri í Gaza, eftir at herdeildirnar høvdu kringsett sjúkrahúsið.
Talan er um eitt indonesiskt sjúkrahús í býnum, Beit Lahia.
Leiðarin á sjúkrahúsinum, Marwan Sultan, sigur, at bæði heilsustarvsfólk og sjúklingar eru í stórum vanda.
Sum skilst, er indonesiska sjúkrahúsið eitt av trimum, sum eru eftir í norðara parti av Gazageiranum.
Ísraelski herurin hevur áður kravt, at fólk skulu rýma av sjúkrahúsum har norðuri í Gaza, men sjúkrahúsini eru full av særdum og øðrum sjúklingum.
Tískil hava starvsfólkini á hesum sjúkrahúsum sýtt fyri at akta ísraelsku boðini.
Sambært sjúkrahúsleiðaranum í býnum, Beit Lahia, byrjaðu ísraelsku álopini á sjúkrahúsið tiðliga í morgun.
Sagt verður, at sjúkrahúsið er fullkomiliga kringsett av ísraelskum stríðsvognum.
- Streymurin er slitin, og ísraelsku herdeildirnar hava lopið á triðu og fjórðu hædd á sjúkrahúsinum, sigur leiðarin á sjúkrahúsinum.
Tíðidastovan NTB veit at siga, at í minsta lagi 50 fólk eru deyð í ísraelskum álopum ymsastaðni í Gazageiranum í dag.
