Fyri fyrstu ferð nakrantíð var Tórsbreyt karmur um eina altjóða kapping, tá stóra ítróttarøkið leygardagin hýsti opnu kappingini, Jatnatøk, ið hevði umleið 20 føroyskar íðkarar, umframt 10 íðkarar úr Svøríki, Danmark og Íslandi – sum eisini sást aftur á norðurlendsku fløggunum, ið veittraðu yvir Tórsbreyt.
Væta var í luftini og tað var heldur grátt í veðrinum ta fyrstu løtuna av kappingini, men sum tíðin gekk, klárnaði tað og gjørdist heilt gott veður við lítlum og ongum vindi. Streymslitið hjá SEV spældi tó eisini eitt puss, tí tað forðaði fyri, at elektroniska tíðtøkan kundi fáast at virka beinanvegin.
Men í aðrar mátar gekk alt upp á stás, og ikki minst var svenski frásøgumaðurin, Daniel Bergin, við til at geva kappingini tað altjóða snittið, ið skuldi til, tá hann hevði fleiri bóltar í luftini í senn, men púra trygt fekk kunnað áskoðararnar, ið so líðandi gjørdust alsamt fleiri í tali, væl og virðiliga um fleiri kappingar í senn. Hann hevur royndir frá stórum kappingum í Svøríki, so sum DN Galan, og tað bæði sást og hoyrdist eisini!
Rógvi og Rúni vunnu
Fyrstu kappingarnar, ið fóru í gongd, vóru hæddarlop hjá kvinnum og síðani monnum, spjótkast hjá monnum og 800 metra renning fyrst hjá monnum og síðani kvinnum.
Í hæddarlopi hjá kvinnum leyp svenski favoritturin, Sofie Björklund, 164 sentimetrar og vann framman fyri Lív Svabo Jónsdóttir, sum er hálvur føroyingur úr Íslandi, og svensku Natalie Westman. Hjá monnum var svenski Jakob Sandman stórfavorittur og vann við 181 sentimetrum, men afturfyri var kappingin hørð um næstu plássini, ið fóru til ávikavist Kristian Martin Garðalíð og Steinolv Geyti, ið báðir lupu 156 sentimetrar.
Í spjótkasti vóru tveir bólkar, menn og dreingir 14-15 ár. Hjá monnum vann Rógvi Højgaard sannførandi við einum kasti upp á 54,07 metrar, og so var tætt millum Helga Geyta, Høgna Debes og Trónd Arge, ið tóku næstu plássini. Í bólkinum dreingir 14-15 ár vóru bara tveir íðkarar, men spenningurin var so mikið størri, tí Hallur Simonsen lá allan vegin beint framman fyri svenska Felix Nilsson, sum tó megnaði at yvirhála í síðsta kastinum, tá hann kom upp á 30,27 metrar.
Í 800 metra renning hjá monnum var Rúni Seloy favorittur og vann eisini sannførandi við tíðini tveir minuttir og 7,5 sekund framman fyri Hans Jacobsen og síðani svenska Linus AppelSkjutar á triðja plássi. Hjá kvinnunum vann svenska Natalie Tolvers, sum var hálvttriðja sekund framman fyri Bjørk Herup Olsen, og beint í hølunum á teimum kom Rebekka Fuglø.
Føroyskt met
Síðani vóru kappingar í 5.000 metra renning hjá kvinnum og monnum, slegguvarpi hjá kvinnum, trístøkki hjá kvinnum og at enda 100 metra renning hjá bæði kvinnum og monnum.
Hjá monnunum royndist Meinard Ortind drúgvastur á 5.000 metra teininum við tíðini 17 minuttir og 41,6 sekund og var hann góðar tveir minuttir framman fyri Brian Smedemark. Sum nevnt aðrastaðni á ítróttarsíðunum, vann Bjørk Herup Olsen 5.000 metra renningina hjá kvinnum og setti nýtt føroyskt met við tíðini 17 minuttir og 49,7 sekund. Nummar tvey var Súsanna Skylv og á triðja plássi svenska Julia Nilsson.
Í sleggjuvarpi vóru tvær kvinnur í kapping, og her eydnaðist donsku Marie Hansen at vinna á Randi Kúrberg, sum var fyrstu ferð aftur í kapping eftir langan steðg. Og í trístøkki var bara tann eina kvinnan við, sum var svenska Louise Arvidsson, ið hóast sín unga aldur vann við longdini 11,26 metrar, ið er betri, enn nakar hevur lopið í Føroyum í ár.
At enda vóru so 100 metra finalurnar í renning, har talan var um eina finalu hjá kvinnum og bæði A- og B-finalu hjá monnum. Hjá kvinnunum stóð mesta kappingin millum tær báðar svensku, Natalie Tolvers og Louise Arvidsson, ið frammanundan høvdu vunnið ávikavist 800 metra renningina og trístøkk. Natalie vann við tíðini 13,07 sekund framman fyri Louise, og á triðja plássi kom Maiken Olsen.
Í A-finaluni hjá monnum vann Rói Højgaard við tíðini 11,90 sekund framman fyri Dánjal Jákup Niclassen og Rógva Højgaard, ið startaði best, men kortini varð yvirhálaður av hinum báðum. Í B-finaluni vann Kristian Martin Garðalíð.
