Tað verða í løtuni gjørdar umskipanir í stóru byggifyritøkuni J&K Petersen. Ein avleiðing er, at stjórin seinastu mongu árini, Steinolvur Petersen, sum saman við mammu síni Ragnhild Petersen eigur 80 prosent av byggifyritøkuni, fer frá sum stjóri.
Fyribils er hann í farloyvi.
Tað hevur ikki eydnast okkum at fáa fatur á Steinolvi Petersen, og fyribilsstjórin, Sigtór A. Petersen, vil einki siga, men vísir til nevndarformannin, Christian Andreasen, sum heldur einki vil siga uttan tað, at tey koma við eini fráboðan seinni í vikuni.
Seinasta roknskaparárið hjá fyritøkuni var ikki gott. Hon hevði hall upp á 24 milliónir krónur – og uttan kapitalpartar var hallið 28 milliónir krónur.
Til samanberingar hevði hin stóra byggifyritøkan og kappingarneyti hjá J&K Petersen, Articon, eitt yvirskot upp á slakar 17 milliónir krónur.
Seinastu trý roknskaparárini hjá J. & K. Petersen Contractors P/f hava annars víst yvirskot upp á ávikavist 6 milliónir krónur, 16 milliónir krónur og 9 milliónir krónur.
Eginogn felagsins er nú góðar 42 milliónir krónur. Hjá felagnum starvast sambært roknskapinum á vinnuvitan.biz 118 fólk.
