Í dag fyllir Jónleif Johannesen, løgtingsmaður Javnaðarfloksins, 40 ár.
Hann er føddur ólavsøkuhaftan í 1978 og er úr Dali á Sandoynni.
Jónleif er sonur Jóanes og Oddvør Johannesen. Hann er giftur við Rannvá á Steig. Tey bæði eiga børnini Høgna Jónleifsson á Steig, Rakul Jónleifsdóttir á Steig og Bjørg Jónleifsdóttir á Steig.
Jónleif er útbúgvin fólkaskúlalærari og er í starvi sum fyrsti lærari í skúlanum á Fossanesi - haðani hann tó hevur farloyvi, nú hann er løgtingsmaður.
Jónleif Johannesen gjørdist løgtingsmaður eftir at landsstýrið varð skipað aftan á løgtingsvalið 1. september í 2015, tá fýra landsstýrisfólk hjá Javnaðarflokkinum máttu hava fólk fyri seg í løgtinginum, sum lógin fyriskrivar.
