2. páskadagur gjørdist ein góður dagur hjá føroyskum kvinnufótbólti.
Fyrr í dag vann føroyska kvinnulandsliðið í fótbólti 8-0 á Andorra, men fyri løtu síðani gjørdist dagurin enn bjartari, tí Malta vann 2-1 á Georgia, sum leygardagin vann 2-0 á Føroyum. Maltesisku kvinnurnar skoraðu málið í tíðini dómarin hevði lagt aftrat.
Hetta merkir, at bólkurin í undanundankappingini er víðopin. Malta hevur seks stig, meðan Føroyar og Georgia hava trý stig. Andorra hevur einki stig enn.
Ger føroyska kvinnulandsliðið sína skyldu og vinnur á Malta, og Andorra tapir ímóti Georgia við seks málum ella færri, so vinna Føroyar seg víðari í EM-undankappingina.
Andorra tapti bert 3-5 ímóti Malta. Í 0-8 ósigrinum ímóti Føroyum fingu tær spælara útvístan longu í 18. minutti. Nú kann tað vísa seg at verða týðandi, at føroyska liðið megnaði at gagnnýta tað, og vinna sær ein góðan málmun.
Støðan í bólkinum
1. Malta 2 dystir 7-4 6 stig
2. Føroyar 2 dystir 8-2 3 stig
3. Georgia 2 dystir 3-2 3 stig
4. Andorra 2 dystir 3-13 0 stig
