Ísraelski uttanríkisráðharrin, Eli Cohen, sigur sambært Reuters, at leyslatingin av teimum 50 gíslunum, sum Hamas hevur í Gaza, byrjar antin hósdagin ella fríggjadagin.

Tað var í nátt, at Ísrael og Hamas samdust um eina vápnahvíldaravtalu.

- Avtalan byggir á, at Hamas letur 50 gíslar leysar yvir fýra dagar, og hesar dagarnar verður ein fyribils vápnahvíld millum stríðandi partarnar og soleiðis ongar hernaðaratgerðir.

Reuters veit at siga, at Hamas esini hevur váttað, at fyribils vápnahvíldin er í hús og leggur aftrat, at 150 palestinar verða latnir leysir úr ísraelskum fongslum.