Kaj Leo Holm Johannesen, løgmaður, er nú boðin á fund við Thomas Bach, forseta í Altjóða Olympisku nevndini, IOC.
Har fara teir báðir at tosa um umsóknina hjá føroyingum um at fáa sjálvstøðugan limaskap í IOC, so at vit kunnu vera við á olympiskum leikum, undir føroyskum flaggi.
Fundurin verður í Lausanne í Sveits tann tann 21.mai.
Tað var í 1984, at Føroyar søktu um sjálvstøðugan limaskap í IOC, men síðani hevur umsóknin ligið.
Í heyst var ÍSF á fundi við embætisfólk í IOC og tá fingu føroysku umboðini at vita, at umsóknin frá 1984 ikki verður viðgjørd eftir gomlu reglunum.
Eftir teimum kundu føroyingar nevniliga fingið limaskap í IOC. Men síðani eru reglurnar broyttar, so nú eru tað bara sjálvstøðug lond, sum kunnu vera limir og tí sleppa vit ikki upp í part.
Løgmaður hevur tí biðið um fund við forsetan fyri at taka málið upp á hægsta stig og føroyingar tvíhalda um, at okkara umsókn skal viðgerast eftir teimum reglum, sum vóru galdandi, tá ið umsóknin varð send.
- Ein olympiskur limaskapur hevði havt stóran týdning fyri føroyskan ítrótt, sigur løgmaður í morgun.
- Men sum støðan er, eru útlitini fyri einum limaskapi trupul, leggur hann afturat.
Men nú fær hann so høvi at føra føroysku sjónarmiðini fram fyri sjálvum forsetanum í IOC.
- Føroyar luku treytir fyri limaskapi tá ið vit søktu. Tískil vóni eg, at IOC er sinnað at taka umsóknina upp til eina veruliga viðgerð, sigur løgmaður.
Fundurin í mai verður fyrsti fundur millum ein føroyskan løgmann og ein IOC forseta.
