Fótbóltssamband Føroya hevur tikið av eini innbjóðing av Malta um at Malta og Føroyar spæla vinardyst í fótbólti á Malta týsdagin 19. November.
Tað skrivar FSF á síni heimasíðu.
Tað merkir sostatt, at føroysku landsliðsspælararnir fáa ikki frá, tá ið landskappingin endar næsta leygardag.
Dysturin verður spældur á Ta' Qali Leikvøllinum, ið hevur pláss fyri 18.000 áskoðarum.
- Tað er altíð gott hjá føroyska landsliðnum at fáa vinadystir, tí seinastu nógvu árini hevur tað verið torført hjá okkum at fáa tílíkar dystir, serliga á heimavølli, sigur Jóannes Jakobsen, hjálparvenjari á A-landsliðnum við FSF
Hesin dysturin hevur nevniliga við sær, at Malta kemur hendanvegin í juni mánaða næsta ár.
Í fjør fóru landsliðsvenjararnir undir at hava vetrarvenjingar við landsliðsleikarunum, og hendan venjingin heldur fram komandi vetur, tá landskappingin endar.
- Nú hava vit so ein dyst at venja fram ímóti, umframt ein møguligan dyst tíðliga í mars mánaða komandi ár, og tað ger tað hugaligari við vetrarvenjingunum, sigur Jóannes Jakobsen.
Føroyar og Malta hava spælt ímóti hvør øðrum tríggjar ferðir áður. Í undankappingini til HM 1998 vóru londini í bólki saman, og í 2004 spældu Føroyar og Malta vinadyst á Svangaskarði.
Í EM-undankappingini endaði báðir dystirnir við 2-1 sigri til Føroyar, og í vinadystinum vann føroyska landsliðið 3-2.
Á seinasta FIFA-styrkislistanum er Malta nummar 140, skrivar FSF.
