Tað vera trý lið við føroyskum landsliðsleikarum at finna millum tey átta liðini, ið skulu kappast í endaspælinum um danska meistaraheitið í kvinnuhondbólti.
Júst tey trý føroyingaliðini vóru í eldinum í kvøld.
Meðan tað hevur verið greitt leingi, at liðið hjá Janu Mittún, Viborg, og liðið hjá Pernille Brandenborg, Keypmannahavn hava tryggjað sær pláss í endaspælinum, so hevur tað verið meira óvist hjá Mariu P. Nólsoy og hennara liðfeløgum í Horsens.
Men í kvøld tryggjaðu Mariu og liðfelagarnir í Horsens sær pláss í endaspælinum aftaná tepran 32-31 heimasigur á Silkeborg-Voel. Í steðginum var Horsens á odda 19-16, og eitt skiftið vóru tær frammanfyri 25-19 í seinna hálvleiki. Men Silkeborg fekk høvdið fyri seg, og tað byrjaði at sansa at móti dystarenda, men lukkutíð bar tað heim hjá Mariu og liðfeløgunum.
Maria var saman við Fridu Hoel næstbesti málskjúttin hjá Horsens. Tær skutu seks mál hvør. Mai Kragballe var við 13 málum stórskjútti hjá Horsens.
Horsens hevur 19 stig á áttanda plássinum, nú bert eitt umfar er eftir at leika. Ringkøbing og Silkeborg-Voel hava 16 stig hvør, og kunnu ikki røkka áttanda plássinum.
Jana Mittún skoraði eitt mál, legði upp til fýra mál, og vann liðnum eitt brotskast, tá hon og liðfelagarnir í Viborg á útivølli vunnu 27-23 (14-11) á Skanderborg, ið framvegis má klára seg uttan Súnu K. Hansen.
Pernille Brandenborg skoraði trý mál, og vann liðnum tvey brotskøst, tá hon og liðfelagarnir í Keypmannahavn á útivølli taptu greitt 27-36 (11-17) fyri greiða oddaliðnum, Odense sum hevur 50 stig fyri 25 dystir.
Keypmannahavn á fimta plássinum, og Viborg á sætta plássinum hava bæði 30 stig fyri 25 dystir.
