Ein 25 ára gamal maður varð leygarkvøldið skotin til deyðis á eini matstovu í landsynningspartinum av Stokkhólmi.
Hetta skrivar svenska tíðindastovan TT.
Fleiri fólk vórðu síðani handtikin, men eru síðani latin leys aftur sunnumorgunin.
- Vit arbeiða við eini røð av fráboðanum í okkara kanningararbeiði, sigur ein talsmaður fyri løgregluna.
Løgreglan fekk fráboðan um skot, sum vóru latin av umleið klokkan 23:00 leygarkvøldið.
Offrið varð alt fyri eitt flutt á sjúkrahúsið, men lív hansara stóð ikki at bjarga.
Undir skottilburðinum vóru fleiri gestir til staðar á matstovuni, upplýsir løgreglan.
- Eg veit ikki, um teir beinanvegin vóru í vanda, men tað er altíð vandamikið at vera nærhendis einum skottilburði, heldur talsmaðurin víðari.
Svenska kringvarpið SVT hevur tosað við vitni, sum var til staðar undir skottilburðinum.
Vitnið greiðir frá, at viðkomandi brádliga hoyrdi trý hvøll skot í matstovuni, og eftir hetta komu gestirnir fram. Eingin teirra fekk skaða.
Øll, sum vóru á staðnum eru síðani avhoyrd av løgregluni.
Løgreglan noktar at gera viðmerking, tá Aftonbladet spyr, hvør myrdi maðurin er, ella hvat motivið kann vera.
- Tað er ein maður, sum er skotin, og hann er staðfestur deyður. Hvør hann er og hvat motivið kann vera, tað er ikki nakað vit vilja koma nærri inn á í løtuni, sigur løgreglumaðurin í Stockholm, Johan Hårdrup.
Skottilburðir verða javnan framdar í Svøríki, sum er tað landið í Evropa, har flest morð verða framd við skotvápnum í mun til talið av íbúgvum.
Hetta sæst millum annað í eini greining frá Rockwool Foundation frá 2023.
Sambært Rockwool Foundation er talið av árligum skottilburðum í Svøríki vaksið munandi seinastu áratíggjuni - úr 10 í 2010 til yvir 60 í 2022.
Til samanberingar doyðu 11 fólk av skottilburði í Danmark í 2022.
Fólkatalið í Svøríki er næstan dupult so stórt sum í Danmark.
/ritzau/
