Í morgin letur nýggjur Bónus matvøruhandil upp í Marknagili. Handilin, sum er góðar 950 m2 til støddar, opnar fyri fyrstu ferð klokkan 9 í morgin.
Niels Mortensen, stjóri í SMS, er spentur og gleðir seg til nýggi Bónushandilin letur upp í Marknagili, har nógv virksemi annars er nú fyri tíðina við nýggjum miðnámsskúla og aðrari bygging.
- Tað er altíð spennandi og nakað serligt, tá mann opnar nýggjan handil, so vit eru spent, sigur hann við in.fo.
Nýggi handilin skilir seg nakað frá hinum Bónushandlunum.
- Handilin er nøkunlunda á sama støði sum tann í Hoyvík, men er tó í einum øðrum skapi. Hann hevur eisini eitt bakarí í handlinum, sum hinir Bónus handlarnir ikki hava, sigur Niels Mortensen, stjóri í SMS.
Atlit hevur eisini verið tikið til umhvørvið, tá handilin varð bygdur.
- Vit hava lagt stóran dent á at gera handilin grønan og umhvørvisvinarligan. Har er CO2 anlegg, og hitin verður endurnýttur frá kompressarunum, og so er alt ljósið LED, sigur SMS stjórin.
